今日，海事處青年小組再次聯同Women's International Shipping & Trading Association Hong Kong（WISTA HK）舉辦活動，帶我哋參觀太平洋航運集團有限公司。

一入到去，人力資源部嘅同事Emily就簡介太平洋航運嘅業務，再帶我哋導覽辦公室。太平洋航運係全球最大嘅小靈便型及超靈便型乾散貨船船東同營運商之一，船隊由約300艘貨船組成。佢哋以現貨同長期貨運合約，為貿易商同生產商提供貨運服務。太平洋航運總部位於香港，喺世界各地共設有14間辦事處。

同事Emily提到公司非常注重員工健康，所以辦公室設有寬闊嘅休息區同健身房，供員工放鬆身心，每個星期四晚仲會有瑜珈班添。辦公室亦設有獨立隔音工作室，方便員工專注思考。

參觀完辦公室後，技術部同船泊部嘅同事分享佢哋喺太平洋航運嘅工作經驗。我最深刻係海員分享行船嘅經歷。佢提到行船可以順便遊覽唔同國家，認識當地文化同擴闊視野。喺船上亦可以同唔同國籍嘅人合作交流。佢好享受船上嘅生活，因為可以帶俾佢喺岸上得唔到嘅體驗。

之後，人力資源部嘅同事同我哋講解公司嘅職業發展，佢哋有明確嘅晉升階梯，亦非常歡迎應屆畢業生，無論有無相關經驗都可以。公司會為新入職嘅員工提供三個月嘅專業培訓，鼓勵佢哋勇於學習新事物。

最後，租賃部、營運部同投資發展部嘅同事分別分享各部門嘅特色。例如要對全球經濟具有敏銳嘅觸角，並緊密關注市場趨勢和動向，以提高市場競爭力。太平洋航運最近亦喺杜拜設立咗新嘅辦公室，顯示佢哋對當地航運業嘅需求有信心。公司採取一系列可持續發展措施，包括船隊減碳、員工安全、多元化同平等機會等。

去完呢次參觀，我深入了解咗航運公司係點運作，各部門之間係點協調、安排。佢哋都不約而同表示每日工作上都會遇到新嘅挑戰同有趣嘅事情，享受工作帶來嘅滿足感。