今日，海事處青年小組聯同Women's International Shipping & Trading Association Hong Kong（WISTA HK）舉辦活動，帶我哋一眾成員參觀華光海運控股有限公司。

首先，華光嘅職員Abbie為我哋簡介華光嘅歷史、業務同公司架構。華光扎根香港超過70年，經過三代傳承，如今發展成一間備受尊崇嘅航運企業。華光作為船東，擁有多樣化嘅船隊，包括散貨船、油輪同液化天然氣加注船。佢哋亦運用對船舶生命周期嘅熟悉，為全球客戶提供新船監造、船舶管理、船舶買賣等服務。最近，華光推出咗一系列減碳措施，以響應可持續發展目標。

跟住，佢哋嘅職員帶我哋導覽辦公室。辦公室裝設咗互動地圖，上面有晒華光旗下所有船隻嘅實時位置、貨物詳情同航海天氣資訊等等，可見一向被視為傳統產業嘅海運業界都積極融入創新科技。

華光仲搵嚟啱啱由深圳辦事處落嚟香港嘅孔船長同我哋見面。佢詳細講解咗Rightship Safety Score，一個商界常用嘅遠洋船安全評分系統，亦強調華光重視船隊嘅質素及客戶嘅信賴。

最後，華光嘅同事Brian同Karen分享咗佢哋入行嘅經過同喺華光嘅工作。Brian帶出船舶融資、海事保險、海事法律等岸上海事專業其實環環相扣；Karen就藉一次統籌緊急修船嘅經歷，道出海運業工作嘅挑戰同成功感。言談之間，我都感受到佢哋對呢個行業嘅熱誠。被問到有咩建議俾年輕人，佢哋都話後生仔應該主動啲發問，亦可以多啲出席研討會去增值自己同建立人際網絡。

今日嘅活動令我知道海運業唔淨只得「行船」，背後仲牽涉好多專業服務。等我都考慮下本地船公司嘅實習計劃同職位空缺先！