香港海事博物館「海事女性的專業與力量：從港口管理到未來展望」分享講座及參觀
為響應「國際海事婦女日」嘅倡議，加深大眾對海事女性的認識和關注，香港海事博物館喺7月4號舉辦咗一場「海事女性的專業與力量：從港口管理到未來展望」嘅講座，邀請到海事處港口管理科助理處長陳嘉敏女士Carmen親臨分享。面對如此難得嘅學習同交流機會，我哋海事處青年小組當然唔會錯過啦！
講座上，Carmen同我哋大談佢豐富嘅航海經驗。作為香港首位女船長，佢直言女性「行船」難免會遇到唔少挑戰，例如體力上比唔上男性，初期要克服嚴重嘅暈船浪問題等等。不過，Carmen都憑住堅韌嘅毅力克服咗種種身體局限，更發掘出女性嘅獨特優勢——心思往往比較細密、更加體貼同懂得設身處地為他人著想。呢啲特質喺佢晉升為管理層後，成為咗好重要嘅溝通與管理技能。佢鼓勵對航海有興趣嘅女仔大膽投身海事行業，一圓「行船」夢！
不過聽完分享先知，原來海員嘅工作真係一點都唔簡單！平日除咗要協助船舶靠離岸、做設備檢查同基本保養之外，更加要精通滅火同急救技能，以隨時應對海上各種突發緊急情況。雖然「行船」算唔上係一份佗佻（粵語讀音：「他條」）嘅工作，但Carmen表示從來冇後悔過。學識獨立生活，到訪異國他鄉，甚至學習天文地理，都係「行船」嘅必經之路。佢話就算一年有幾個月要離開屋企確實會掛住屋企人，但每一次嘅遠別，都令佢更懂得珍惜喺香港同屋企人團聚嘅時光，返香港之後同佢哋關係亦因而變得更好！
講座結束後，海事博物館為青年小組嘅會員安排咗導賞服務。導賞員嘅講解生動有趣、詳盡清晰，帶我哋睇咗好多由中國古代到現代嘅珍貴船隻模型，加深咗我哋對船舶結構、航運同海上貿易歷史嘅認識。
館內仲有好多創新嘅互動裝置，大家都玩得不亦樂乎！例如，其中一個展館擺放咗多個裝有不同香料嘅木桶，參觀者可以湊近聞一聞。呢啲香料不單止係過去香港重要嘅進出口商品，更係昔日東西方海上貿易嘅象徵。旁邊仲設有一個電視螢幕，生動咁顯示出香港商船嘅貿易路線。呢啲互動體驗都令我深刻體會到，海事航運自古以來都係連接香港與世界嘅重要橋樑。從昔日乘風破浪嘅香料商船，到今日繁忙嘅國際航運樞紐，海運業一直推動住香港嘅經濟命脈。通過呢次參觀，我哋對海運業嘅歷史傳承與重要性，都有更具體同深刻嘅了解。
Carmen喺講座中強調幾次，時下青年人「要把握機會去認識呢個世界，睇下世界到底有幾大」。如果大家都有興趣參觀海事設施或了解航運業運作，記得到以下網址登記成為海事處青年小組會員，一齊參加海事處青年小組定期舉行嘅參觀活動和就業講座！
