今次參加由海事處青年小組安排嘅參觀活動，同香港理工大學嘅同學仔一齊走訪咗港澳客運碼頭、船隻航行監察中心（VTC）及海上救援協調中心（MRCC）！機會非常難得！

首先，助理海事主任 Louis 向我哋介紹船隻航行監察中心（VTC）嘅主要職能。原來監察中心早喺 1989 年成立，主要負責分享海上交通資訊、規管航行秩序同埋應對突發事故等工作。中心會監察香港水域內各艘船隻嘅動向，為航隻提供安全資訊，確保航行安全。

之後，高級海事主任 Neo 安排咗一個網上問答遊戲，考考我哋對海上交通的認識，氣氛輕鬆又充滿互動，十分有趣！Neo 同時講解海上救援協調中心（MRCC）嘅背景同職能，仲分享點樣利用雷達同船隻自動識別系統等設備去協助監察香港水域嘅海上交通。

最後，我們更有機會親身走入 VTC 和 MRCC 參觀，近距離觀察海事處人員點樣即時同船隻負責人通話、提供交通資訊，親身了解中心嘅日常工作流程。如果第日要加入海事處工作，我真係要認真考慮畢業之後去「跑船」，積累航海經驗！

如果大家都有興趣參觀海事設施或瞭解航運業運作，記得到以下網址登記成為海事處青年小組會員，一齊參加海事處青年小組定期舉行嘅參觀活動和就業講座。

https://mdyouthgroup.mardep.gov.hk/tc/join-us/index.html

海事處青年小組亦歡迎有興趣嘅團體參加者電郵到 mdyouth@mardep.gov.hk，相關同事會進一步和貴機構聯絡安排有關活動。