今日我參加咗海事處青年小組舉辦嘅首項活動，同其他成員一齊參觀青洲燈塔。

海事處十分重視青年發展，海事處嘅兩位副處長王先生同林女士都有出席今次嘅活動，同我哋打成一片。喺前往青洲嘅船程上，海事處嘅高級助理船務主任阮先生為我哋介紹沿途嘅錨地同輔航設備。原來，海上嘅「馬路」稱為「主要航道」，而航道上設置咗不同顔色同形狀嘅燈浮標，以協助船長定位，避免船隻偏離航道或進入危險水域。每個浮標有成11噸咁重，部分更位於偏遠水域，海事處人員要維修保養都真係唔容易㗎！

青洲位於維多利亞港西面入口，所以短短二十分鐘後，我哋就抵達青洲碼頭。值得一提嘅係，原來青洲周圍屬於禁區範圍，除非獲海事處處長批准，船隻唔可以進入青洲低潮標100米範圍以內。

登岸後步行約5分鐘就去到燈塔嘅下方。到達後阮先生為我哋介紹燈塔嘅歷史同用途，舊青洲燈塔同新青洲燈塔係香港現存五座戰前燈塔嘅其中兩座。多年來，新舊青洲燈塔為數以萬計由東博寮海峽進入香港嘅船隻輔航，喺香港海事史上佔有重要嘅地位。

令我非常驚喜嘅係，我哋仲可以登上新燈塔塔頂，近距離觀賞訊號燈，同埋欣賞360度無敵海景！唔講唔知，青洲燈塔以前係有燈塔管理員駐守。佢哋為咗守護船隻同海員嘅安全，長期喺島上過住遠離人煙嘅原始生活，十分偉大。去到1970年代，燈塔先至改為全自動化，並以太陽能發電。燈塔內嘅裝置仲識得偵測光暗，所以喺有充足光源嘅時候佢唔會着，冇光嘅時候就會着燈。現時，青洲燈塔嘅訊號燈可以照射至16海浬外，大約相當於灣仔金紫荊廣場至羅湖口岸嘅直線距離。

回程嘅時候，助理海事主任Danny同二級海事督察溫先生同我哋分享佢哋喺海事處唔同分部嘅日常工作同晉升階梯，並鼓勵年輕人加入海事處，為香港海事服務出一分力。

雖然今日天氣十分炎熱，但係我哋每個人都好開心可以登上歷史悠久嘅青洲燈塔。期待下一次去其他海事設施參觀！