今日，海事处青年小组联同Women's International Shipping & Trading Association Hong Kong（WISTA HK）举办活动，带我哋一众成员参观华光海运控股有限公司。

首先，华光嘅职员Abbie为我哋简介华光嘅历史、业务同公司架构。华光扎根香港超过70年，经过三代传承，如今发展成一间备受尊崇嘅航运企业。华光作为船东，拥有多样化嘅船队，包括散货船、油轮同液化天然气加注船。佢哋亦运用对船舶生命周期嘅熟悉，为全球客户提供新船监造、船舶管理、船舶买卖等服务。最近，华光推出咗一系列减碳措施，以响应可持续发展目标。

跟住，佢哋嘅职员带我哋导览办公室。办公室装设咗互动地图，上面有晒华光旗下所有船只嘅实时位置、货物详情同航海天气资讯等等，可见一向被视为传统产业嘅海运业界都积极融入创新科技。

华光仲揾嚟啱啱由深圳办事处落嚟香港嘅孔船长同我哋见面。佢详细讲解咗Rightship Safety Score，一个商界常用嘅远洋船安全评分系统，亦强调华光重视船队嘅质素及客户嘅信赖。

最后，华光嘅同事Brian同Karen分享咗佢哋入行嘅经过同喺华光嘅工作。Brian带出船舶融资、海事保险、海事法律等岸上海事专业其实环环相扣；Karen就借一次统筹紧急修船嘅经历，道出海运业工作嘅挑战同成功感。言谈之间，我都感受到佢哋对呢个行业嘅热诚。被问到有咩建议俾年轻人，佢哋都话后生仔应该主动啲发问，亦可以多啲出席研讨会去增值自己同建立人际网络。

今日嘅活动令我知道海运业唔净只得「行船」，背后仲牵涉好多专业服务。等我都考虑下本地船公司嘅实习计划同职位空缺先！