今日，我同海事处青年小组一众成员参观大连海事大学实习船「育鲲」轮。

之前都有所听闻呢艘世界最先进嘅远洋航海专用实习船，终于可以上船见到「育鲲」轮嘅庐山真面目啦！

一开始，由大连海事大学嘅学生带我哋上船参观及介绍船上设施。「育鲲」轮系中国第一艘自行开发设计，专门针对航海专业学生使用嘅实习船，总长116米，阔18米，深8.35 米，总吨位6,000吨，定员236人，航速为每小时18海里，持续航行能力10,000海里。船上设备先进，设有多媒体教室、餐厅、图书室、学生宿舍等设施。

之后，我哋上到第二层嘅驾驶室，入面放置咗好多先进航海仪器，例如雷达、电子海图、通讯系统等设备。大连海事大学嘅同学们就逐一为我哋介绍各仪器嘅用途，仲教我哋点样运用雷达去睇船只位置、风速等数据添。

到咗最后分享环节，同学们为我哋分享实习行船嘅经历同心得。我发现原来船上工作唔系表面睇咁简单，背后需要用到好多专业航海知识，而且每个岗位都十分之重要。有机会我都想同佢哋一齐「行船」见识下呢个世界！